АЛКАШ ЯСЫЙСЫЗ БИТ ИНДЕ...
Элегрәк булган бу хәл. Әле татарлар эчү белән, әлеге замандагы кебек, бик нык мавыкмаган чакларда булган, диләр. Бер ир авыл магазинына "төшәргә” була. Ә магазин, билгеле инде ул вакытта, агачтан салынган борынгы бура. Бу иркәй, караңгы төндә, такталарны каерып, идән астыннан магазинга керә. Сизмәсеннәр, дип бер генә ярты аракы алып чыга бу магазиннан. Шулай да була икән: сизмәгәннәр моның магазинга кергәнен. Теге такталарны әйбәтләп куйган бит әле ул. Икенче көнне тагын бу, такталарны каерып, магазинга керә, тагын күп алмый бу – бер ярты аракы гына. Бер ай буе шулай кабатлана бу хәл. Шунсы кызык, берсе дә сизмәгән бу иркәйнең магазиннан аракы "ташыганын”. Бер ай үткәч үзе магазинга килгән бу ир. Елаплап ялвара икән: -- Үтерәсез бит. Алкаш ясыйсыз бит инде, ныклап ямап куегыз инде шул тишегегезне, - дип әйтеп биргән, ди бу. Тишекне ямаганнар, диләр... Теге иргә дә берничә ел "ямап” куйганнар инде.
| 
