Нардуган - татар милли бәйрәме. Безнең җирлектә бәйрәмнең тамырлары Идел буе Болгарстанына кадәр барып тоташа. Шуңа күрә әлеге бәйрәм барлык Идел-Урал халыкларының да милли календарендә күрсәтелгән. Тик Нардуган турында әле безнең бөек бабаларыбыз һуннар яшәгән вакытларда да билгеле булган. Анда ул 12 көн дәвам иткән һәм 3 бөек бәйрәмнең берсе булган.
Бәйрәм көн-төн тигезләшкән вакытта, ягъни 21-22 декабрьләрдә үткәрелгән. Хәзер дә ул бәйрәм ителә торган җирләр бар, тик күпчелек нардуганны хәзерге вакытта керәшен татарлары бәйрәме буларак кабул итә. Керәшеннәр, бәйрәмнең көннәрен үзгәртеп, христиан бәйрәме көннәрендә ("святочные дни", иске календарь белән 25 декабрь - 6 гыйнвар булса, хәзергесе буенча 7 - 18 гыйнвар) үткәрәләр. Нардуган да, "святки" дип аталган христиан бәйрәме дә чынлыкта бер үк мәҗүси бәйрәм булган. Аларның тамырлары бер, тик үткәрелү көннәре генә башка. Христианнар аны рәсмиләштерүгә ирешкәннәр, ә мөселманнар - юк. Шул сәбәпле бәйрәм әкренләп онытыла бара.

Сынамышлар буенча, нардуганнан соң "кышкы челлә" - 40 көнлек бураннар башлана.

Нар - монгол теленнән ут, ялкын, кояш дип тәрҗемә ителә. Дуган (туган) сүзе төрки-татар теленнән алынган. Ягъни бәйрәм исемен кояш туу дип аңлап була.
чыганак: http://vk.com/wall-29754787_72?hash=0454318a21863a0ed8